提起裝修報價好多新業主都好頭痕，究竟間屋需要做啲咩項目？好嘅開始係成功嘅一半，事前做足準備梗有著數，睇吓呢個post幫唔幫到你！
舊裝清拆：
好多時，裝修嘅第一步就係拆野！如果你係買二手樓嘅話，首先要檢查下舊有嘅天花、地板、窗、牆身有咩特問題，需唔需要完全拆走晒，另外就係入牆傢俬嘅數目等等，當然越多嘢要拆就會越貴啦～而新樓嘅話一般都唔會有好多嘢要拆，除非你想拆走多餘嘅牆身將單位重新間隔啦～留意一般清拆費用都包埋倒泥頭同棄置傢俬！保留上手部分裝修未尚不是件好事，如果非常新淨又能重用，環保之餘還可節省不少裝修和物料費！
水電：
第二件事就係要檢查新屋嘅水電，睇吓有冇漏水漏電、有冇電線外露、需唔需要換喉、水壓夠唔夠。萬一間屋舊到仲係用緊鐵喉或者電線行明線就可能牽涉安全問題，需要做大工程更換。而電掣位通常都係逐個計，唔想洗多餘錢最好就事前規劃好各式電器嘅擺位！
泥水：
如果單位有漏水問題，就要重新進行防水處理同地台，屬於最優先考慮事項！另外有關泥水事項包括鋪瓦、做櫃枱石面等等，如需重新規劃單位間隔，就要另留預算搵泥水師傅重新砌牆。
木工&傢俬：
如果上手選用實木門嘅話好多時都可以用返，唔使換門可以慳唔少架！萬一需要重新做過，通常買門嘅價錢同安裝都係分開嘅，可以因應預算選擇唔同款式。另一重點項目就係訂造傢俬，因應單位嘅大小度身訂製，比起買現成家具更慳位！收納空間多寡足以影響成間屋嘅格調，事前規劃好重要！好重要！好重要 ！(要講三次) 近年流行做地台什至小閣樓增加儲物空間，亦係一個可以考慮嘅方向！
油漆：
油漆造價的價錢差異可以很大，取決於樓底高度、舊牆身狀態等，而且好多時要到開工先發現，是最常出現附加費嘅原因！成日聽人講「剷底」，是指將牆身的舊乳膠漆及鬆浮底灰移除，呢個動作能保證新油漆的耐用度，相對價錢亦較貴。預算有限嘅話可以考慮請師傅局部修補亦即係「執灰」，新樓通常「執灰」即可，但遇上樓齡較大嘅單位可以先請較專業嘅意見！
冷氣：
冷氣機有分體式同窗口式，窗口式冷氣機是最傳統的冷氣種類，需要用支架安裝在窗框上或冷氣機台上，選購前應確認冷氣機大小和家中窗台位置是否配合。而分體式冷氣安裝程序刖比較繁複，並可能牽涉室外高空工作。
清潔：
千祈唔好睇小專業嘅清潔服務，施工期間難免會有大大小小嘅污漬，例如油漆漬、膠漬等等，唔係普通家用清潔劑可以解決到，呢個時候專業嘅裝修清潔服務就可以幫你一次過處理！ — 用咗上述項目之外，整個單位嘅大細、設計嘅風格同用料都會好影響最終報價，如果預算有限，建議尋求諮詢之前可以先將需求列出，製作一份全屋裝修清單，再按優先順序排好，出左報價之後再行取捨！
